فكرة مشروع عقاري بالمشاركه بناء شقق سكنية بنظام المشاركه

السلام عليكم ..
طيب اليوم حابي أتكلم عن مشروع شويه بعيد عن الصناعه والزراعة حتكلم عن مشروع عقاري بالمشاركه
#الفكره

بناء شقق سكنية بنظام المشاركه
#شركة_مساهمة_عامه

#مدخل
من الملاحظ ارتفاع أسعار الشقق والبيوت في السودان بشكل غريب وبالمقارنه بي نفس مساحه الشقه او البيت في اقرب الدول لينا بنلقي انو الموضوع ده خرافي .. تعتمد الفكره علي المشاركه في بناء عمارة سكنية وتقسيم الحصص علي المشاركين

#خطة_العمل

شراء قطعة ارض وبناء 6 طوابق ومحلات تجارية تقسم تكلفتها بالتساوي علي المجموعه المشاركه
#بمعني انو لو في 12 شخص اجتمعو وعملو شراكه ذكية ممكن كل واحد يمتلك شقه احلامو بسعر بسيط

#مثال
بالنسبه للمغتربين عشان تشتري شقه في حته كويسه محتاج علي ما يقل عن 100 الف دولار(370الف ريال او درهم ) اللي هي 4 مليار بي حساب اليوم .

طيب لو اجتمع ال12 شخص ديل وعملو قروب واتس واتعرفو علي بعض اكتر ويقررو ينزلو السودان مع بعض عشان المكاتبات والشغل القانوني وكبداية كل واحد دفع 50 الف ريال يكون المجموع 600 الف ريال او مايعادلها بالدولار او الجنيه السوداني
اللي هي 5مليار و400 الف جنيه دي ممكن المجموعه تشتري منها قطعة الأرض في حته كويسه خلينا نقول 4 مليار ويتم بداية البناء بباقي المبلغ ممكن يتعمل الفاونديشن ( طبعا في رسوم حكوميه ومحامي وتاسيس شراكه ووو )
بعد مرور 6 شهور ممكن نفس المجموعه تجمع تاني مبلغ 50 الف ريال او مايعادلها بالدولار او الجنيه السوداني حيكون عندها نفس المبلغ اللي هو 600 الف ريال وده مبلغ كافي لتكملة البناء .
بالطريقه دي كل واحد من ال 12 شخص حيكون عندو شقه خاصه بيهو زايد عائد من المحلات التجارية الحتتبني في الطابق الأرضي وممكن العائد التجاري يوظف لدفع الكهرباء والماء والحراسه .

طيب .. الفكره دي اتطبقت علي ارض الواقع من مجموعه في دولة قطر ومجموعه تانيه في السعوديه وتقريبا كل زول استلم شقتو وامورو واضحه .
المشروع ده لو اطبق في الولايات يعني كل ناس ولاية عملوهو براهم التكلفه ممكن تقل نسبة لرخص الأراضي

أسئلة لدعم البوست :
أسعار الأراضي في مناطق كويسه ؟؟
أسعار الخرط ؟؟
الإجراءات الحكوميه من رسوم وووو ؟؟
اتعاب المحامي (تسجيل وابرام عقود وحماية ملاك ) ؟؟
هل مبلغ ال 600 الف ريال او مايعادلها من دولار او عمله محليه كافي لبناء 6 طوابق ؟؟
هل مبلغ المليار سوداني كافي لبناء الفاونديشن فقط ؟؟

*** في ناس عندها أراضي وماعندها الامكانيه عشان تبني ممكن يدخلو مع أي مجموعه وتكون مشاركه بالأرض يعني يتم تقييم الأرض ويشوفو نصيبو يطلع كيف ( شقه . شقتين علي حسب ماتجي ) .
وعشان الناس كلها تستفيد ممكن المشاركين الشركه المنفذه والمقاول والمحامي ومصمم الخرط والديكور من داخل القروب .
دي الفكره والناس ممكن تضيف عليها او تعدلها .

طيب مع البحث في النت لقيت في زول بشرح في الموضوع ده وحاسبها علي 4 اشخاص بس وبالدولار
((الفكرة ناجحة جدا ومجربة لانها باختصار شديد تقسم اكبر واصعب مرحلتين علي اربعة شركاء وهي مرحلة شراء الارض ومرحلة التاسيس، التكلفة التقديرية للمباني في السودان هذه الايام مرحلة التاسيس حتي القريت بيم والردم حوالي 100 دولار للمتر المربع مرحلة الاعمدة والسقف حوالي 70 دولار للمتر المربع يعني لو مساحة المباني 200 متر مربع تكلفتها 20000 دولار مرحلة الهيكل حتي سقف الارضي حوالي 14000 دولار والدور الثاني مثله مضافا علي كل مرحلة حوالي 30بالمائة للمقاول والاشراف وينصح بتنفيذ اي مرحلة مما ذكر كاملة دون توقف وبعد ذلك تاتي مرحلة التشطيب ودي تختلف اختلاف كبير حسب رغبة كل شخص وقد تتراوح بين 150 الى 250 دولار لذلك ينصح بالشراكة حتي مرحلة المباني ويترك التشطيب الداخلي لكل حسب ميوله وامكاناته ودي طبعا كلها اسعار تقديرية لوضع تصور مبدئي يعني التاسيس والهيكل لدورين بمساحة بناء 200 متر مربع حوالي 48000 دولار مع المقاولات والاشراف حوالي 60000 دولار اذا اخذنا الارض حوالي 40000 دولار يصبح الاجمالي 100 الف دولار لاربعة شركاء 25000 دولار لكل وفي مدة حوالي ثلاثة اشهر يكون باقي التشطيب بس، ومحتاجين محامي فقط لموضوع عقود الشراكة فقط وبقية المراحل تسلم لمهندس بعقد واضح وغالبا يتم توزيع الشقق بالقرعة وتكون الارض والخدمات شراكة حسب نظام الشقق التمليك))

وبالتوفيق للجميع