فكرة مشروع عن ترحيل العفش ( الأثاث المنزلي )

فكرة مشروع جديد بالسودان :
ترحيل العفش ( الأثاث المنزلي )

فكرة مشروع جديد بالسودان :
ترحيل العفش ( الأثاث المنزلي )
‏...
معروف أن أي زول عايز يرحل من بيت لي بيت أو مكتب لي مكتب بعاني في مسألة الترحيل لأنو ما في جهة مختصة ترحل ليك ، ح تجيب دفار وعتاله ح يكسرو ليك نص العفش ويخربشوه والمشكلة الكبرى في الشاشات والأجهزة الألكترونية الحساسة .
‏....
طيب نعمل شنو وكيف : ؟؟
الفكرة ببساطة كالأتي :
تجيب عربات ترحيل عفش معمولة بصندوق شحن مختص بالموضوع ده فيهو أدراج وأماكن مخصصة للشاشات والاجهزة ، وتجيب عربات اصغر حجما" لترحيل المكاتب وتجيب مقطورات دي ممكن الزول يأجرها وجرها بي عربيتو عادي
‏....
طيب البميزني شنو ؟
‏..
المبيزك أنك بتكون عندك الترحيل بعرباتك المختصة ثم عندك
‏* فنيين فك وتركيب أثاث
‏* فنيين شاشات وديجتل
‏* فنيين أكسسوارات وتحف وديكور وستائر .
‏* فنيين كهرباء وتكييف وتبريد
‏* عمال عتالة متخصصين
‏* عمال نظافة
‏* لوحات حائطينة بطريقة ظريفة هدية
‏* مشرف مختص ، مهندس
‏* وممكن يكون عندك فنيين نقاشه ودهان ، وسباك ديل بالتعاقد على حسب ..
وبعدها ح توفر الخدمات حسب الطلب
الفنيين ديل ما تجيب الشغاليين في السوق ، لأ جيب شباب ودربهم براك بمدربين مختصيين
....
يتصل عليك شخص عايز ترحيل بمشي المشرف بعاين العفش وبوريهو محتاج شنو وشنو وبكلف كم ، تم الإتفاق بتصل بالشركة وبحرك الطاقم بتاعو جاهز بي عدتو وفنيينو .
وهكذا ......
المستهدف .. الأحياء الراقية والاحياء والوسط ، الشركات والمؤسسات والبنوك والمحلات التجارية
‏...
عمل اعلان مكثف . ترويج على مركبات الترحيل ، ينوفورم للعمال ،
‏...
لو متذكرين بداية شغل شركات النضافة كان ليها شنة ورنة والناس كلها بعد داك عجبتها الفكرة بعد الشركة الأولى كسبت ما كسبت
‏..
حسي الشركة دي لحدي ما الناس نفكر تقلدك بتكون استفدت جد . ولو طورت شغلك وعملت أسم كويس ح تمسك السودان ده كلو بفروع ومافي زول يقدر ينافسك .
‏...
الفكرة أنا طارحها لله ساي أي زول عجبتو يشيلها ينفذها ويدعي لينا