نصائح فعالة تعلّمنا كيف نقول لا

○ متين اقول لأ ؟
○لمنو اقول لأ ؟
○ وليه اقول لأ ؟
بقدر ما الكلمة دي ما حلوة ، وممكن تدي انطباع ما كويس عننا ، وقد تكون سبب في قطع علاقات ، لكن لابد منها ، في ناس " مستنزفين " لازم تتقال ليهم الكلمة دي ، وفي ناس " قريبين مننا " بس بيجونا في اوقات ما بنقدر نعمل ليهم الحاجة العايزنها مننا فما ينفع نجامل على حساب نفسنا !!
طيب متين اقول لأ :
*لما يكون في زول عايزنا نعمل حاجة ما عايزنها لازم نقول لأ.
* لما نحس انه في شخص بستغل طيبتنا وبقدم مصلحته ع حسابنا يبقى مفروض نقول لأ.
* لأ للزول البستعجلنا ناخد قرار ، وما دايرنا نفكر ابدا .
* لأ للزول العايزنا نقدم ليه وما يبادلنا الحاجة دي .
* لأ للاتعود مننا على كلمة " نعم " و " كويس" عشان يعرف اننا كمان ممكن نقول لأ ونرفض .

انك تقول لأ معناها بتوصل رسالة للزول انك ما دايما متاح ، وبتخلي يحترم رغبتك وما يتعشم بزيادة فيك ، وده مهم عشان لما تقول دايما " نعم " ، قد توصل مرحلة ويبقى فرضا عليك تقول " نعم " وما ينفع ابدااا تقول لا او تعتذر من حاجة ، لانك عودتهم ع كده .
ممكن في البداية الموضوع يكون صعب لكن لابد منه ، والبيزعل منك ويسيبك لما تقولها خليه ، لانو ما قدرك وما احترم رغبتك او انشغالك

قولو لأ يا جماعة ، ولو ع سبيل التعود ، خلو الناس يتوقعوها منكم ، وما يعشموا بزيادة .

اضافة :
ممكن نتدرج عشان نقولها لو صِعبت علينا ، المهم نقولها ، وفي ناس عزيزين علينا ديل ممكن نغير طريقتنا فيها ، بس يبقى المعنى وااحد .